როგორ ატყუებენ სექსუალური გამომძალველები ბავშვებსა და მოზარდებს ?

• გამომძალველები, რომლებიც მსგავს დანაშაულებს სჩადიან, არიან გამოცდილები. მოზარდთან დაკავშირების საშუალებად შესაძლოა გამოიყენონ ნებისმიერი ონლაინ ვებგვერდი, თამაში, აპლიკაცია ან პლატფორმა. გამომძალველმა კომუნიკაციის დამყარება შესაძლოა დაიწყოს კომპლიმენტებით, რომანტიკული ურთიერთობის დაწყების მოჩვენებითი სურვილით ან ნდობის სხვა ფორმით მოპოვებით;
• გამომძალველები ასევე იყენებენ კომუნიკაციის დამყარების ისეთ საშუალებას, როდესაც ინტიმური ფოტოების/ვიდეოების გადაგზავნის სანაცვლოდ მსხვერპლს მოტყუებით სთავაზობენ მისთვის მნიშვნელოვანს და ღირებულს. შესაძლოა ეს იყოს სამოდელო ხელშეკრულების გაფორმების შესაძლებლობა, ონლაინ თამაშებისთვის საჭირო კრედიტები და კოდები, ფული, კრიპტოვალუტა ან სასაჩუქრე ბარათები;
• ზოგიერთ შემთხვევაში, ნდობის მოსაპოვებლად გამომძალველები მოტყუებით არწმუნებენ მსხვერპლ მოზარდებს, რომ თვითონაც გაუგზავნიან ინტიმური შინაარსის მასალას ან მართლაც უგზავნიან და ამით ახალისებენ, რომ მანაც განახორციელოს ანალოგიური მოქმედება;
• ზოგიერთ შემთხვევაში, სექსუალური გამომძალველი პირდაპირ გადადის მუქარაზე და მოტყუებით არწმუნებს მსხვერპლს, რომ თითქოს მას უკვე აქვს ინტიმური შინაარსის ფოტო/ვიდეო მისი გამოსახულებით, რომელსაც გაავრცელებს, თუ მის მოთხოვნას არ დაემორჩილება, ასევე მოძალადე შესაძლოა დაემუქროს მოზარდს, რომ მისი მხრიდან მოთხოვნის შეუსრულებლობის შემთხვევაში ზიანს მიაყენებს მისთვის ძვირფას ადამიანებს ან სხვებს ეტყვის, როგორ ცუდად მოიქცა გადაგზავნილ ვიდეოში მოზარდი, რაც მისი და საყვარელი ადამიანების რეპუტაციას ძალიან დააზიანებს. პირველი ფოტოს/ვიდეოს ხელში ჩაგდების ან სექსუალური შინაარსის მიმოწერის  დაწყების შემდეგ, გამომძალველები მსხვერპლს ძირითადად ემუქრებიან აღნიშნული ფოტოს, ვიდეოს ან მიმოწერის გავრცელებით და შანტაჟის გზით ცდილობენ დამატებითი ფოტოების/ვიდეოების მიღებასა და შემდგომი კომუნიკაციის გაგრძელება/გახანგრძლივებას.

როგორ გამოიყურება გამომძალველის პროფილი?

• გამომძალველები სოციალურ ქსელებში ხშირად ქმნიან ყალბ, მოზარდი გოგონებისა და ბიჭების პროფილებს;
• გამომძალველების ანგარიშებს ძირითადად ჰყავთ ცოტა მიმდევარი (Follower), მეგობარი და ადვილად მისახვედრია, რომ ახალი შექმნილია;
• ზოგიერთ შემთხვევებში, მეტი სანდოობისთვის, გამომძალველები სოციალურ ქსელებში ხდებიან ბავშვის ან მასთან დაახლოებული პირების გამომწერები/მეგობრები;
• გამომძალველები ზოგჯერ ახერხებენ მსხვერპლთან დაახლოებული პირების რეალური სოციალური ანგარიშების გატეხას (კიბერ დანაშაულის ინსტრუმენტების გამოყენებით) ან ქმნიან ზუსტად მსგავს პროფილებს, რაც მათ უადვილებს მსხვერპლთან კომუნიკაციის დაწყებას.

რა უნდა მოიმოქმედოთ სექსუალური გამოძალვის დროს:

• გახსოვდეთ, თქვენ არ ხართ დამნაშავე;
• შეინარჩუნეთ სიმშვიდე და იცოდეთ, რომ დახმარება და მხარდაჭერა შესაძლებელია;
• დაუყოვნებლივ შეწყვიტეთ ყოველგვარი კომუნიკაცია დამნაშავესთან;
• არ გადაურიცხოთ თანხა, რადგან არ არსებობს გარანტია, რომ ეს შეაჩერებს გამომძალველს;
• ეცადეთ შეინახოთ მტკიცებულებები;
• გადაიღეთ მიმოწერის ე.წ სქრინები;
• შეინახეთ წერილობითი თუ ხმოვანი შეტყობინებები, ვიდეოები და სურათები;
• მოინიშნეთ მომხმარებლის პროფილის სახელი/ლინკი, ელექტრონული ფოსტის მისამართები, ტელეფონის ნომრები და საბანკო ანგარიშის მონაცემები;

მშობლების საყურადღებოდ !:

ნებისმიერი ბავშვი, რომელსაც გააჩნია ინტერნეტთან და გაჯეტებთან წვდომა, შესაძლოა გახდეს სექსუალური გამოძალვის მსხვერპლი. ასეთ დროს მსხვერპლს ახასიათებს შემდეგი სახის ქცევა:

• საკუთარი თავის, ოჯახისა და მეგობრებისგან გარიყვა;
• სკოლაში შეფასებების გაუარესება ან აქტივობებისთვის თავის დანებება
• არაორდინალური ქცევა, რომელიც გამოიხატება მომეტებულ გაღიზიანებაში, შიში ან/და ამოუხსნელი სიბრაზე;
• ფსიქოლოგიური, ემოციური ან ფიზიკური ტრავმა;
• თვითდაზიანება ან მსგავსი სახის ქმედების განხორციელების ფიქრები/იდეები;
• ამოუხსნელი მისწრაფება, რომ გაიქცეს და შეიცვალოს ადგილმდებარეობა.

რა უნდა მოიმოქმედოთ იმ შემთხვევაში, თუ თქვენი ბავშვი გახდა სექსუალური გამოძალვის მსხვერპლი: 

• დანაშაულის აღსაკვეთად აუცილებელია ბავშვთან/მოზარდთან ღიად საუბარი იმ საფრთხეებზე, რომელიც შეიძლება თან ახლდეს ინტერნეტის საშუალებით უცხო პირებთან კომუნიკაციას;  აუციელებელია წინდახედულობის გამოჩენა რისკების შემცველ ქცევასთან დაკავშირებით - ინტერნეტში ბავშვის/მოზარდის ფოტოს, ვიდეოს, მიმოწერის, კომენტარის, ადგილმდებარეობის ან რაიმე მაიდენტიფიცირებელი მონაცემის განთავსებით ფაქტობრივად გამოხატავთ თანხმობას, რომ აღნიშნული ინფორმაცია შეიძლება მუდამ ხელმისაწვდომი იყოს;
• მუდმივად უნდა გაუმეოროთ ბავშვებს, რომ მსგავს შემთხვევაში ისინი არ არიან/არ იქნებიან დამნაშავეები, არამედ არიან მსხვერპლები;
• აუხსენით და ხშირად გაუმეორეთ ბავშვებს, რომ აუცილებელია, ღიად ისაუბრონ საკუთარ შიშებზე და შესაძლო საეჭვო კომუნიკაციაზე;
  
  

• წაახალისეთ ბავშვები, რომ ზრდასრულებთან (მშობელი, მასწავლებელი ან სხვა სანდო პირი) ისაუბრონ სექსუალური გამოძალვის ხასიათზე, ფორმებზე და შემთხვევებზე);
• გახსოვდეთ, რომ სექსუალური გამოძალვა შესაძლოა განხორციელდეს ინტერნეტის, ონლაინ თამაშების, აპლიკაციების და სხვა კომუნიკაციების გამოყენებით;
• აუცილებელია, რომ როგორც მშობელი გაეცნოთ და თქვენი მეთვალყურეობის ქვეშ მოაქციოთ ის აპლიკაციები, ვებგვერდები და ონლაინ ფორუმები, რომლებსაც ძირითადად იყენებენ ბავშვები;
• აუცილებელია, ბავშვის ინტერნეტ აქტივობების რეგულარული მონიტორინგი და დროის ხანგრძლივობის საჭიროებისამებრ შემცირება;
• გახსოვდეთ, რომ ბავშვების აპლიკაციებზე და სოციალურ პლატფორმებზე გამოიყენოთ ძლიერი პაროლები და გქონდეთ მათი მონიტორინგის საშუალება;
• აუხსენით ბავშვებს, რომ მნიშვნელოვანია უცნობი პირებისგან მიღებული ფაილების, ინფორმაციის, შეტყობინებებისა თუ ზარების იგნორირება.